ԻՐԱԶԵԿՈՒՄ՝ տրանսպորտային միջոցների գազաբալոնների վկայագրման գործընթացի նկատմամբ պարտադիր տեսաձայնագրման պահանջի սահմանման վերաբերյալ

ՀՀ քաղաքաշինության, տեխնիկական և հրդեհային անվտանգության տեսչական մարմինը (այսուհետ՝ Տեսչական մարմին) հարկ է համարում իրազեկել, որ 2026 թվականի փետրվարի 26-ին Հայաստանի Հանրապետության կառավարությունն ընդունել է ՀՀ կառավարության 2021 թվականի դեկտեմբերի 9-ի N 2011-Ն որոշման մեջ փոփոխություններ և լրացումներ կատարելու մասին որոշում։

Հիշեցնենք, որ ՀՀ կառավարության 2021 թվականի դեկտեմբերի 9-ի N 2011-Ն որոշմամբ սահմանվում է սեղմված բնական կամ հեղուկացված նավթային գազով աշխատելու համար ավտոտրանսպորտային միջոցների վրա գազաբալոնային սարքավորումների տեղադրման և գազաբալոնների պարբերական վկայագրման ու պարբերականության կարգը։

Գազաբալոնների պարբերական վկայագրման գործընթացում առկա իրավական բացերի վերաբերյալ Տեսչական մարմինը գրությամբ դիմել էր ոլորտային քաղաքականություն մշակող Լիազոր մարմնին՝ առաջարկելով կատարել համապատասխան փոփոխություններ և լրացումներ։

✔️Արդյունքում, ընդունված որոշմամբ սահմանվել են հետևյալ նոր պահանջները.

✔️Գազաբալոնների պարբերական վկայագրման գործընթացը պարտադիր տեսագրվում է։

✔️Տեսագրությունը պետք է ներառի ավտոտրանսպորտային միջոցը, հաշվառման համարանիշը և վկայագրման գործընթացը։

✔️Տեսագրությունները պահպանվում են առնվազն 6 ամիս։

✔️Առանց տեսագրման վկայագրումն արգելվում է։

✔️Տեսագրումն իրականացվում է ապաանձնավորված տարբերակով (բացառությամբ վկայագրումն իրականացնող անձի համաձայնության դեպքերի)։

✔️Տեսագրությունների պահպանման և սարքավորումների անխափան աշխատանքի ապահովման պարտավորությունը կրում են վկայագրում իրականացնող կազմակերպությունները։

✔️Պահանջի դեպքում տեսագրությունները լիազոր մարմնին կամ վերահսկողություն իրականացնող տեսչական մարմնին տրամադրվում են 5 աշխատանքային օրվա ընթացքում։

Նշված փոփոխություններն ուժի մեջ են մտնում պաշտոնական հրապարակման օրվանից մեկ ամիս հետո՝ 2026 թվականի մարտի 26-ին։

Փոփոխությունների նպատակն է ապահովել գազաբալոնների պարբերական վկայագրման գործընթացի թափանցիկությունը, բարձրացնել անվտանգության մակարդակը և ուժեղացնել վերահսկողությունը։

Տեսչական մարմինը հորդորում է գազաբալոնների պարբերական վկայագրում իրականացնող տնտեսվարողներին խստորեն պահպանել օրենսդրությամբ սահմանված պահանջները և պատշաճ կերպով իրականացնել վկայագրման գործընթացը։